A Asociación Galega do Xogo Popular e Tradicional, xunto a Nova Escola Galega, ven de convocar o I Curso de formación sobre o patrimonio lúdico. "Os xogos tradicionais. Perspectiva educativa", que se vai desenvolver nas instalacións do IES de Melide os días 2 e 3 de outubro de 2009
O curso ten un límite de 80 prazas e está dirixido ao profesorado de ensino primario e secundario, así como a Educadores/as do Tempo Libre. Para participar, hai que achegar a ficha de inscrición xunto ao xustificante de pagamento. Esta ficha pode atoparse nos web da AGXPT ou de NEG.
Máis información sobre os contidos e o procedimento do curso aqui

Vindeiro sábado 29 de agosto, a localidade de Santalla, no concello llugués d’A Pontenova, convertirase -por terceiro ano consecutivo- nun punto de atención importante no eido dos xogos tradicionais.

Máis de 20 entidades teñen prevista a súa participación nesta xornada que reunirá a máis de 150 xogadores de Galiza, Portugal, Asturias e Castela-León.
Serán perto de 70 xogos e deportes tradicionais os que se poderán ver e practicar nesta pequena vila desde as 11:00 horas.

O apartado musical contará coa presenza dos grupos Darbukka, Folkgazais e o Grupo de Música tradicional da Escola de música tradicional da Pontenova, que actuarán apartir das 16:00 horas.

Hoxe celébrase en Sta. Cruz de Arrabaldo (Ourense) a XII Baixada de Carrilanas, organizada pola escudería local A Bruxa de Arrabaldo.
A primeira baixada cronometrada terá lugar ás 18 h. e a segunda baixada ás 19.30 h. aínda que desde as primeiras horas da tarde han ter lugar as verificacións técnicas, recepción de carrilanas e recoñecimento da pista.
Xa de noite terá lugar unha cea popular e unha discoteca móbil.
Esta baixada está inscrita na Federación de Deportes de Inercia, polo que está suxeita ao regulamento técnico da propia federación FDI. Ademáis, a proba vai ser puntuable para o Campionato galego.
Programa

Esta fin de semana ten lugar en Allariz unha nova edición da Festa da Empanada. Esta celebración, que ten lugar entre 21 e 23 de agosto, ven celebrándose anualmente desde o ano 1971 e entre as actividades programadas dentro da festa está o habitual Campionato de Billarda, que ten lugar hoxe desde as 9 h. no Campo da Barreira.

Aínda hai tempo para asistir á festa, que se celebra nun deses espazos fermosos de verdade que temos ao longo do país.

Programa

Onte martes 18 daba comezo en Melide, organizada pola AGXPT, a III Festa de xogos tradicionais e todas as prazas da vila de Melide foron re-convertidas en espazos de xogo, recuperando a súa tradicional función como lugares para o lecer. Na Praza do Convento púdose correr coas carrilanas, na Praza das Coles tirouse á chave, na Praza do Pozo Pequeno practicouse o Tiro á lata (xogo este xenuíno da Terra de Melide), e así até un total de 10 recunchos onde desde tempo inmemorial se xogou diariamente. A xornada terá continuidade no día de hoxe, no que cabe salientar o Campionato de Tirapedras ou a exibición de lanzamento dun trompo de 30 gramos.
Programa

Nas pasadas datas desenvolveuse na comarca burgalesa da Ribeira do Douro un Encontro internacional de xogos tradicionais, no que se incluían distintas actividades, entre as que salientaban a celebración da Asemblea de verán da Asociación Europea de Xogos e Deportes Tradicionais - AEXDT, un Congreso sobre xogos tradicionais e saúde ou un encontro entre distintas modalidades de xogos europeos.
A asemblea serviu para botar unha ollada cara atrás, 8 anos despois da fundación, renovar o Consello de Administración e propoñer a creación dunha entidade de carácter mundial, para a que xa houbo contatos ao longo do último ano.

A Asociación de Xogadores de Chave de Compostela ten programado para os días 16, 17 e 18 de xullo o XXXI Campionato de Chave das Festas do Apóstolo 2009. Desde hai uns anos desenvolvese de xeito paralelo un Campionato feminino, que chega á súa IV edición. Todas as partidas desenvolveranse na Alameda de Santiago.
O vindeiro 1 de agosto tamén teñen pevisto celebrar o Torneo da Amizade, onde participarán –ademáis de equipas de Santiago- seleccións de Ourense e A Coruña. Será no Campo da festa de Figueiras - Santiago.

Máis de 100 embarcacións van participar no IX Encontro que este ano 2009 ten como sede a vila de Muros. Este evento é o máis senlleiro dos organizados pola Federación Galega pola Cultura Marítima e Fluvial (FGCMF), que xa conta con 8 edicións anteriores, e que cada dous anos reúne nunha vila mariñeira galega a embarcacións tradicionais e tripulacións chegadas de toda Galiza e doutros portos peninsulares e europeos para celebraren unha grande xuntanza festiva, de exhibición e reivindicación do patrimonio marítimo.

Programa definitivo

Esta fin de semana, Aranda del Duero acollerá un importante número de actividades arredor do xogo tradicional. Ademáis do Congreso de xogos (anunciado noutra nova deste web), o Palacio dos Condes de Avellaneda (en Peñaranda de Duero) acollerá tamén a Asemblea da Asociación Europea de Xogos e Deportes Tradicionais – AEXDT, na que máis unha vez participará Brinquedia, ademáis dun Encontro internacional de xogos tradicionais. Galiza terá o seu espazo neste encontro, con presenza de 3 modalidades de Chave, 1 de Birlos e a Loita galega. Ademáis da galega, participarán tamén delegacións de Aragón, Asturias, Canarias, Cantabria, Castela e León, Cataluña, Valencia, Dinamarca, Finlandia, Francia e Portugal, entre outras.

Vindeiro venres 10 de xullo dará comezo na localidade burgalesa de Peñaranda de Duero o Congreso mundial de xogos tradicionais e saúde social. O Congreso, que se desenvolverá no Palacio dos Condes de Avellaneda. O programa contará con relatorios e comunicacións desde as 9 da mañá, nos que intervirán, entre outros []bGuy Jaouen[/b], Pere Lavega, Pierre Parlebas, Juan Carlos Martín Nicolás, Henning Eichberg, Chuchchai Gomaratut ou Óscar Incarbone, que desenvolverán as temáticas das súas presentacións arredor da relación entre as práticas lúdicas das distintas culturas e a saúde.
Programa do congreso