Brinquedia

Onte venres asinábase na Cidade da Cultura (Santiago de Compostela) un protocolo de colaboración entre o conselleiro de Cultura e Educación en funcións, Xesús Vázquez Abad e os presidentes da Comisión Organizadora do Eurofestival 2013 e de Brinquedia - Rede Galega do Xogo Tradicional, Xosé Lois Vázquez Pardo e Alberto Casal Lamas, respectivamente, para a promoción do xogo tradicional galego e máis concretamente, do festival europeo de xogos tradicionais e a Asemblea da AEXDT que terá lugar en Galiza no vindeiro ano 2013. No acto tamén estivo presente o secretario xeral de Cultura, Anxo Lorenzo.

Na pasada fin de semana tivo lugar -na localidade occitana de Rodez- a Asemblea anual da Asociación Europea de Xogos e Deportes Tradicionais (AEXDT). Escollérase a capital do departamento de L’Aveyron por celebrar o centenario do clube local de Quilles de huit. Rodez acollía así aos membros da asociación, procedentes das distintas comunidades culturais de 7 estados europeos. Na reunión debateuse sobre a vulnerabilidade das propostas para a posta en valor do patrimonio lúdico na situación de crise actual. A asemblea complementouse con un coloquio sobre os xogos de tradición cultural e unha demostración de xogos tradicionais europeos, onde houbo espazo para 3 modalidades de bolos galegos. Os anfitrións acollían, ademáis, os campionatos nacionais franceses de Quilles de huit.

O pasado 2 de xuño Brinquedia – rede galega do xogo tradicional celebrou unha nova edición do Encontro escolar de xogos tradicionais. Nesta ocasión, a convocatoria –de grande importancia para a promoción e difusión do xogo tradicional no ensino- tivo lugar na Fundación de Exposicións e Congresos d’A Estrada e nas súas inmediacións.

Á parte do web de Brinquedia , eis algún material gráfico da xornada. Por unha parte, unha presentación preparada polo CEIP de Vite I (Santiago de Compostela) e por outra unha galería de fotos da ANPA do CPI San Sadurniño.

Vindeiro sábado 2 de xuño, é a data na que Brinquedia ten convocada a VI edición do seu Encontro Escolar de Xogos Tradicionais. O evento celebrarase no recinto da Fundación de Exposicións e Congresos d’A Estrada.
Aínda está aberto o prazo para a participación dos centros de ensino, que se pode formalizar através do sitio web de Brinquedia, cubrindo e enviando a ficha de inscrición antes do 25 de maio.
Ademáis da organización e dos centros participantes, o Encontro faise posíbel grazas á Fundación de Exposicións e Congresos d'A Estrada, á Secretaría Xeral para o Deporte, ao MUPEGA, a Paideia-Galiza, a GADISA, ao CRDOP Arzúa-Ulloa, ao Club de Loita galega A Cambadela, a ARCASCO, ao Clube de Amigos da Chave de Ferrolterra, á Asociación Cultural e Deportiva da Chave de Ourense e á Asociación de xogadores da Chave de Compostela.

Un ano máis, Brinquedia promove entre en todo o país a celebración do Día do Peón en centros educativos, concellos e entidades asociativas. A data elexida volta a ser o 11 de novembro facendo bon o noso refrán Polo San Martiño, peóns ó camiño.
O acto central desta edición será no concello de Fene, polo que a elaboración do manifesto correu por conta do escritor fenés Ramón Loureiro, que podedes descargar máis abaixo, xunto a outros materiais de interese.
A novidade desta edición é a celebración do día en distintos lugares da península, tais como Euskadi, onde a Ikastola Alkartu (Barakaldo - Bizkaia), organiza unha exposición virtual de peóns decorados; Catalunya, coa particpiación dos Amics de la Baldufa (Barcelona), e Andalucía, coa colaboración do Museo del Trompo de Sebastián del Pino Cabello (Antequera, Málaga).

Máis información no web de Brinquedia - Rede galega do xogo tradicional

A Asociación Cultural e Pedagóxica Ponte…nas ondas! celebrou o pasado 19 de outubro a 4ª Xornada Escolar de Xogos Tradicionais Galego-Portugueses no colexio Infante Felipe de Salvaterra de Miño onde participaron 300 alumnas/os de Galiza e do Norte de Portugal.
Seguindo a dinámica desta asociación, de dar a coñecer o patrimonio tradicional común a galegos e portugueses, así como duscubrírllelo ao alumnado das dúas beiras do Miño no ámbito escolar, a Asociación Ponte... nas ondas! organizou unha reunión lúdica e non competitiva no marco dun día de convivencia entre rapaces e rapazas de escolas galegas e portuguesas.
Por outra parte, onte 27 de outubro tamén colaborou asociación nunha nova edición do Unidos por un clic, encontro de comunicación escolar organizado polo colexio colombiano Gimnasio del Norte de Bogotá. Nel participaron o CEIP Infante Felipe de Salvaterrra de Miño e o IES Terra de Turonio de Gondomar.

Na pasada fin de semana desenvolvíase na localidade francesa de Mauvezin (Gers – Pays Ports de Gascogne) a Asemblea de verán da AEXDT, exercendo como organizadoras/es e excepcionais anfitrións/oas as/os compañeiras/os de FDFR 32 (Foyers ruraux – CRJSTO).
Despois de aprobar as contas, a acta da asemblea anterior e o informe moral do seu Presidente, informouse sobre as novas incorporacións á Asociación, entre as que se atopan a Fundacion Zaragoza 2016, os bretóns de Ti ar Gouren e as asociacións catalanas Lo Llaut e Anem de Bolit.