A Asociación Cultural e Pedagóxica Ponte…nas ondas! convoca a II Xornada Escolar de Xogos Tradicionais Galego-Portugueses.
Seguindo a dinámica de dar a coñecer o noso Patrimonio Tradicional Común a galegos e portugueses e transmitirllelo ás/aos nosas/os alumnas/os, a Asociación Ponte… nas ondas! organiza unha reunión lúdica e non competitiva no marco dun día de convivencia entre rapaces e rapazas de escolas galegas e portuguesas, na serie de actividades que se están a desenvolver para dinamizar e relanzar o patrimonio inmaterial galego-português.

Vindeiro 11 de novembro Brinquedia convoca a 4ª edición do Día do Peón. Despois da grande repercusión que tivo nos 3 anos anteriores (acadando arredor de 12.000 participantes na edición do ano pasado), e mantendo entre os seus obxectivos o de divulgar iniciativas encamiñadas á recuperación e conservación das actividades lúdicas tradicionais, diríxese esta convocatoria non só aos centros de ensino (nomeadamente os maiores organizadores desta campaña), senón a concellos, asociacións, institucións e mesmo a colectivos de galegas/os no exterior. A estacionalidade deste xogo ven marcada na fraseoloxía galega por dous refráns tais como Polo San Martiño, peóns ao camiño (11 de novembro) e Polo Santo Amaro, peóns ao faiado (15 de xaneiro), substituindo a palabra Peón nalgúns lugares por Pión ou Trompo e mesmo existindo algúns refráns máis como Pola Santa Olaia, peóns á borralla.
MANIFESTO DÍA DO PEÓN 2008

Un novo recoñecemento para o patrimonio inmaterial galego-portugués que se centrará nas persoas portadoras do patrimonio, o que a UNESCO denomina os tesouros vivos. Un procedemento que contribuirá a poñer en valor as manifestacións e expresións máis destacadas deste patrimonio e á súa vez garantirá a transmisión ás novas xeracións. Este sistema foi creado por primeira vez no Xapón e actualmente está implantado nalgúns países como Francia, República Checa, Bulgaria, Rumanía, Filipinas, Tailandia ou Brasil.
Ao mesmo tempo, a Asociación Cultural e Pedagóxica Ponte...nas ondas!, promotora da Candidatura do Patrimonio Inmaterial Galego-Portugués, quer trasladar o seguinte comunicado

Mañá domingo, 19 de outubro, terá lugar -na localidade de Estás - Tomiño unha xornada de xogos tradicionais co slogan "Convivencias interxeracionais e língua". Será apartir das 12 da mañá con actividades para nenas/os e maiores e unha charla sobre xogos tradicionais por conta da AGXPT.

Tamén haberá xantar (consistente en lacón con grelos, patacas, bebidas e sobremesa), ás 14 h., previa inscrición na cafetaría do Centro.

A actividade está organizada polo Centro Social de Estás e a Asociación Xuvenil Buraco do Frade.

No pasado mes de abril celebrouse en Ariana (Tunisia) o I Encontro euro-mediterráneo de xogos tradicionais, coa participación de numerosos paises europeos e africanos, entre os que se atopaban delegacións da propia Tunisia, de España, Bélxica, Franza, Italia, Arxelia, Exipto e Siria.
Baixo o lema "Xogos de onte para mañá" desenvolveronse as distintas actividades programadas para un evento no que as previsións de asistencia foron amplamente superadas. Tamén se formalizaou o convite á AEXDT para participar no festival de Douz (ao sul do Túnez), que acollerá distintas delegacións de xogos tradicionais do 25 ao 28 de decembro deste ano.

Para mover as remansadas augas do río das iniciativas culturais transfronteirizas a A.C. Ponte... nas ondas! e os estudios Casa de Tolos presentan unha nova proba da creatividade e a colaboración galego-portuguesa. Nenos e nenas de Galiza e Portugal xuntan as súas voces ás de Guadi Galego e Vozes da Rádio para reivindicar o noso patrimonio común: o patrimonio inmaterial galego-portugués. Unha composición de Vozes da Rádio coa colaboración de Guadi Galego para a XIV edición de Ponte...nas ondas, que se celebrou no pasado mes de maio.

Mañá sábado 30 de agosto a aldea de Santalla no concello lugués d'A Pontenova acollerá a celebración da II Mostra de xogos e deportes tradicionais. Participarán da Mostra distintas entidades de Galiza, Portugal, Asturias, Castela-León e Euscadi.

Será apartir das 11 da mañá e até as 8 da tarde que se desenvolverán as distintas actividades nun marco verdadeiramente fermoso como é este lugar do interior da comarca da Mariña luguesa.

Nas distintas actividades a desenvolver haberá monitoras/es especializadas/os que explicarán o desenvolvimento das mesmas. Ademáis dos xogos tradicionais, tamén haberá espazo para a música e para a monta dacabalo, que será coordenada polos Cabaleiros do Gabeas.

Co obxectivo de lle dar pulo aos xogos tradicionais na comarca do Barbanza, ven de nacer unha nova asociación, Enredos, colectivo que, xunto ao Concello de Noia, vai poñer en marcha no primeiro semestre deste ano 2008 os Encontros de xogos tradicionais na rúa.
Con este programa, que botará a andar vindeiro día 19 no barrio de San Lázaro, dábase a coñecer o colectivo o pasado sábado 12 na Casa da Cultura Antón Avilés de Taramancos. As actividades proseguirán até o mes de xuño, visitando cada semana un lugar distinto do concello.

E seguimos falando da Candidatura do Património Imaterial e da Asociación Ponte...nas ondas!. Despois de facérense públicos os apoios do Congreso dos Deputados de España e do Parlamento de Galiza a esta candidatura, esta asociación lanza un novo videoclip promocional da NOVA OPORTUNIDADE para o património imaterial galego-portugués.

Pinchando na imaxe podes ver o resultado

E seguimos falando da Asociación Cultural e Pedagóxica Ponte... nas Ondas! e do traballo realizado por este colectivo. Nesta ocasión é para as/os parabenizar por motivo duplo.

Dunha parte, por seguir traballando (e con grande suceso) na promoción das tradicións orais galaico-portuguesas. Doutra parte, por ter acadado algo que se pode ver en mui contadas ocasións: o consenso de todas as forzas políticas representadas no Congreso dos Deputados.